Patawarin N'yo Po Sila

“Father, forgive them, for they know not what they are doing.” – Luke 23:34

Isang dakilang pagmamahal ang mamamalas sa katagang ito na namutawi mula sa bibig ng ating Panginoong Hesus. Habang binabata ang sakit na tumatagos sa buong kalamnan dahil sa pakong ibinaon sa Kanyang paa’t mga kamay, ang pagmamahal pa rin sa sangkatauhan ang laman ng Kanyang puso’t isipan.

Ganito Niya ipinadama ang Dakilang pagmamahal sa atin.

“In this is love, not that we loved God, but that He loved us and sent His Son to be the propitiation for our sins.” – 1 John 4:10

Dahil sa ating sala, Siya’y nabayubay sa krus. Ang Kanyang kamatayan ang nagbigay sa atin ng buhay na walang-hanggan. Ang dugo Niya ang naglinis sa ating karumihan. (Heb. 9:22)

“Patawarin N’yo po sila” – iyan ang katagang tumutungkol sa atin. Kapatawarang laging laan sa sino mang lalapit sa Diyos at hihingi ng paglilinis sa ating karumihan. Kahiman tayo ang sanhi ng Kanyang kamatayan at paghihirap, kapatawaran Niya’y kakamtin kung sasampalataya lamang at tatanggapin Siya bilang Panginoon at Tagapagligtas.

“Patawarin N’yo po sila” - nawa’y ang dakilang pagmamahal na ito na mula sa ating Diyos at Dakilang Lumikha ang magdala sa atin sa Kanyang paanan.

Isang Pagbubulay-bulay
by Max Bringula Chavez

Crucify Him! Crucify Him!

Ito ang kanilang sigaw, "crucify Him, crucify Him!" (Luke 23:21)

Kani-kanina lamang sila itong nagwawagayway ng Palaspas at nagbubunyi sa Kanya, inihahayag na dumating na ang kanilang Hari.

Subalit ano ang nangyari't ngayon ay iba ang kanilang isinisigaw? Mas ninais pa nilang palayain si Barabbas na isang kriminal at si Hesus na walang kasalanan ang magdusa't parusahan at siyang ipako sa krus.

Madali nga bang makalimot ang tao sa kabutihan ng Diyos? Di niya na ba naalala ang mga pagpapalang binibigay at pag-iingat Niya? Na sa oras ng kagipitan o sa paghahangad ng mas akala niya ay magandang bagay, ipagpapalit ang Diyos sa materyal, sa tao at sa ano mang bagay o mga kaganapan, matiyak lamang ang kanyang pakay at makamit ang nais.

"Crucify Him, crucify Him!"

Ganito rin ba ang ating isinisigaw? Dahil ipinagpalit natin Siya.

"There is a way that seems right unto man, but the end of it is destruction." - Proverbs 14:12

Siyasatin ang sarili, baka kasama tayo sa sumisigaw ng "crucify Him!"

Isang Pagbubulay-bulay
by Max Bringula Chavez

Iwagayway Mo

They took palm branches and went out to meet him, shouting, "Hosanna! Blessed is he who comes in the name of the Lord! Blessed is the king of Israel!" - John 12:13

Ganito ang ginawa ng mga Hudyo nang pumasok si Hesus sa Jerusalem upang dumalo sa Feast of Passover. Kanilang iwinagayway ang palaspas na tangan bilang pagbubunyi kay Hesus bilang kanilang Hari.

Na siyang nararapat pagkat si Hesus ay Hari ng mga hari. Panginoon ng mga panginoon.

Ang pagwawagayway ng palaspas o ano mang bagay ay pagpapakita di lamang ng pagbubunyi kungdi ng pagpapasakop, pagkilala at pagtanggap sa hinahandugan nito.

Kung gayon, kung si Kristo ang ating Hari, Panginoon at Tagapagligtas, ano ang iwinawagayway mo bilang pagbubunyi sa Kanya kaakibat ang mataas na papuri at pagsamba?

Wika sa Romans 12:1, “Kaya nga, mga kapatid, alang-alang sa masaganang habag ng Diyos sa atin, ako’y namamanhik sa inyo na ialay ang sarili bilang handog na buhay, banal at kalugod-lugod sa Diyos. Ito ang karapat-dapat na pagsamba ninyo sa Diyos."

Ang ating buhay na puspos ng Kanyang kabanalan ang siya nating iwagayway tanda ng pagkilala kay Hesus bilang ating Hari at Panginoon.

Isang Pagbubulay-bulay
by Max Bringula Chavez

The Greatest Love of All

This is what LOVE is - that God sent His only begotten Son into the world, that we might live through Him. - 1 John 4:9

LOVE has to be celebrated not just once a year, it's not to be remembered not just on V-Day, but to be felt and given, not just to the loveable, but most importantly to the unloveable. Just as how God loved us - unworthy that we are yet He gave His lif...e for us.

In this time of the year - let's remember the great and selfless love that God gave us by greeting one another with the love of the LORD.

Let's celebrate the Greatest LOVE of All.

Kung Manunumbalik Lamang

"If my people who are called by My Name, shall humble themselves, and pray and seek My face, and turn from their wicked ways; then I will hear from heaven, and will forgive their sin, and will heal their land." - 2 Chronicles 7:14

Pinapanood ko kagabi sa TV Patrol ang pinsalang idinulot ni Pedring nang hagupitin nito ang hilagang bahagi ng bansa kasama na ang Metro Manila.

Nakalulunos ang mga imaheng aking nakita. Mga nagbagsakang mga puno, pader, poste at billboards, natuklap na mga bubungan, mga tahanang lubog sa baha, mga paslit na bata, matatanda't kababaihan na lumilikas upang mailigtas ang sarili sa hampas ng bagyo, at marami pang mga nakapanglulumong larawan ng kalagayan ng ating bansa sa ganitong panahon ng kalamidad.

Bakit kaya hindi tinatantanan ang Pilipinas ng unos? Hindi na maka-usad-usad. Lagi na lamang sinasalanta ng iba't ibang kalamidad na gawa ng kalikasan at maging ng sariling kapabayaan.

Bilang isang bansa, bilang isang indibiduwal at bilang isang nilikha - ano kaya ang dapat nating limiin sa ating kalagayan sa harap ng Panginoon.

Pangako Niya na pagpapalain ang sino mang manunumbalik sa Kanya at susunod. Hindi kaya ito ang kadahilanan ng kahirapang nararanasan ng ating bayan?

Remember this, "If my people who are called by My Name, shall humble themselves, and pray and seek My face, and turn from their wicked ways; then I will hear from heaven, and will forgive their sin, and will heal their land." - 2 Chronicles 7:14

Kung gayon, DINGGIN ang tawag Niya. SUNDIN ang hinahayag ng Kanyang Salita. At ang pagpapala Niya'y ating KAKAMTIN.

Isang Pagbubulay-bulay
by Max Bringula Chavez

I'M SORRY

“Sorry, di ko sinasadya. Di ko alam na nasaktan ka pala. Sorry talaga.”

Maaaring pamilyar sa atin ang ganitong mga kataga. Maaaring narinig mo na ito sa isang kaibigan, kapatiran o sa taong malapit sa iyong puso. O maaaring ikaw mismo ay nagbitiw ng ganitong pananalita. Nagsusumamo sa salitang iyong nabigkas na di naman ninais sabihin subalit nasambit na. Kung kaya’t kasunod na lamang niyon ay “Sorry…”

Sadyang malaki ang nagagawa ng maliit na dila na nasa loob ng ating bibig. Maliit subalit makapangyarihan. Sa salita na mula sa dila mapapasunod mo ang isang batalyon, mapapakilos mo ang puso’t isipan ng tao. Maaari itong makapagbigay liwanag at kulay sa madilim na pinagdaraanan. Nakapagdudulot ito ng kalakasan at sigla sa mga napapagal at nalulumbay.

Gayunpaman, sa dila ring iyan nagmumula ang kapamahakan, panghihina, kaguluhan at di pagkakaunawaan.

Kung kaya’t paka-ingatan daw natin ang bawat salita na mamumutawi sa ating bibig. Limiing maigi ang bawat letrang ating titipahin, ite-text at isusulat. Dahil baka sa halip na buhay ang dulot nito, pagkabigo, kalungkutan at kapahamakan ang kamtin ng makakarinig at makakabasa, o kaya’y galit at sakit ng kalooban ang maranasan ng tatanggap.

Ingatan ang labi. Suriin ang sasabihin at isusulat, upang sa kinalaunan ay di babanggitin pagkatapos ang katagang "I'm sorry".

by Max Bringula Chavez

Magalak Ka

by Max Bringula Chavez

“Count it all joy…” – James 1:2

Nakapagpapa-bata raw ang pag-ngiti. Kapag tayo’y masayahing tao, hindi agad tayo tumatanda. Kahit Golden Years na, mukha pa ring 37 years old. Wala pang gitla na mababanaag sa ating noo. Bagama’t umiimpis na ang buhok at unti-unti nang sumisilip ang anit, “baby-looking” pa rin ang ating aura. “...Masayahin kasi”, sabi nila.

Tunay na malaki ang nagagawa ng pagiging masayahin. Yung iba nga ay nanatiling pa ring feeling-eighteen sa paglipas ng panahon. Palagi na lang nagde-debut. Bagamat yung iba ay sadyang ipinako na ang edad sa trenta at thirty-one para raw nasa kalendaryo pa rin.

Ano man ang dahilan ng pananatili nating bata sa paningin, sa itsura man o sa ugali, malaking tulong kung tayo ay laging may taglay na ngiti sa pagharap sa hamon ng buhay.

Ito ang itinuturo sa atin ng Kanyang Salita sa James 1:2, “Magalak kayo!” Count it all joy.

“Magalak kayo kapag kayo’y dumaranas ng iba’t ibang pagsubok, sapagkat alam ninyo na lalong magiging matatag ang inyong pananampalataya matapos ninyong pagtagumpayan ang mga pagsubok na iyan.”

Ito raw ang sikreto. Na sa bawat hamon ng buhay, sa mga pagsubok na dumarating, sa mga suliraning nararanasan, sa mga hirap na binabata, at mga lungkot na nadarama, ngiti raw ang ating isukli. “Count it all joy” ang wika sa ingles.

Magalak ka pagkat ito’y magiging daan upang lalo pang tumibay ang pananalig kung ipagkakatiwala sa Diyos ang nararanasang hirap at pagsubok.

Magalak ka pagkat pagkakataon ito upang mamalas ang kapangyarihan ng Diyos, madama ang Kaniyang pagmamahal at maranasan ang Kanyang pagkilos sa ating buhay.

Magalak ka pagkat pagkakataon din ito upang higit pang makapag-impok ng kayamanan sa kalangitan sa pamamagitan ng patuloy na paglilingkod kahiman dumaraan sa matitinding pagsubok at pasakit.

Magalak ka pagkat may panibagong aral na matutunan sa pinagdaraanang mga pagsubok na magiging tulay din natin upang lalo pang maging matatag at nang sa gayon ay maging daan din tayo upang maging pagpapala sa iba.

Nakararanas ka ba ngayon ng hirap, pighati at kalungkutan sanhi ng mga problema at pagsubok na pinagdaraanan?

Huwag malumbay at manghinawa.

Ituring mo itong isang kagalakan, pagkat ito’y karagdagan sa lalo pang ikalalakas at ikatatatag ng iyong pananampalataya kung ito’y ating mapagtatagumpayan.

Isang Pagbubulay-bulay
@2009 copyrighted